( قهوة مصر )

وانا قاعد عالقهوه معاه
كان بيقَلِّب فى الكوبايه
كان سرحان متاخد شارد
يعنى معايا ومش ويايا

فجأه لاقيته بص وقالى
ركز بس شويه معايا
اللى بنطلب منَّه السلطه
قرر يلعب لعبه حكايه

حط الجماعات بينَّا وبينه
وسحب إيده وقال دى نهايه
واحنا بقينا فى أزمة كبيرة
بين الثورة وبين الغايه

كل ماتيجى تطالبه بحقك
هايصدرهم ليك بعصايا
هايقول دول هما الشرعيه
والصناديق كلمتها كفايه

وان جم هما يشموا نفسهم
يبقى مصيرهم برضه نهايه
ونفضل كده من فيلم لفيلم
نفضل كده نستنى بدايه

بص يا حوده إحنا وهو
زى السكر فى الكوبايه
هو يقلِّب واحنا بنقلب
والشاطر يوضعله نهايه